Dünən Naxçıvan Dövlət Texniki Kollecinin məzunları və kollecə yeni qəbul olan tələbələr ilə görüş keçirilib.
Görüşdə Naxçıvan Muxtar Respublikasının təhsil naziri Rəhman Məmmədov çıxış edərək təhsilə göstərilən dövlət qayğısından danışıb. Bildirib ki, Naxçıvan Dövlət Texniki Kolleci də bu qayğıdan bəhrələnib. Kollec üçün yeni tədris kompleksi istifadəyə verilib. Kompleksdə yaradılan auditoriyalar, kimya-biologiya, fizika və baytarlıq laboratoriyaları, tədris olunan ixtisaslara uyğun fənn kabinələri, kompüter otaqları, kitabxana və elektron vəsaitlər burada təhsil alan gənclərin savadlı, bacarıqlı mütəxəssis kimi yetişməsinə geniş imkanlar açıb. Bununla yanaşı, kollecdə 2021-2022-ci tədris ilində istifadəyə verilən STEAM kabinəsi tələbələrin qazandıqları nəzəri bilikləri praktik tətbiq etmək imkanı yaradıb.
Vurğulanıb ki, kollecdə tədrisin günün tələbləri səviyyəsində qurulmasının nəticəsidir ki, burada muxtar respublikanın tələbatı nəzərə alınmaqla orta ixtisaslı kadrlar yetişir. Kollecdə tədrisin yüksək səviyyədə təşkili, əmək bazarına uyğun kadr hazırlığının aparılması, subbakalavrların müsabiqədənkənar yolla ali təhsil müəssisələrinə qəbulu, hami təşkilatlar tərəfindən kadrların işlə təmin olunması təhsil ocağının nüfuzunu daha da artırıb. Bunun nəticəsidir ki, beş il bundan qabaq kollecə minimum keçid balı 50-70 bal təşkil edirdisə, cari tədris ilində keçid balı 100-200 intervalında olmuşdur.
Təhsil naziri qeyd edib ki, muxtar respublikanın kadr potensialının formalaşmasında mühüm rol oynayan kollecdə ötən tədris ilində, ümumilikdə, 13 ixtisas üzrə mütəxəssis hazırlığı həyata keçirilib. Muxtar respublikada sürətlə artan turizm imkanları və tələbləri nəzərə alınmaqla cari tədris ilindən isə Turizm işinin təşkili ixtisası üzrə tələbə qəbulu aparılmış, ixtisasların sayı isə 14-ə çatdırılmışdır. Tələbə qəbulu planı isə 200-ə qədər artırılmışdır.
Diqqətə çatdırılıb ki, 2022-2023-cü tədris ilində 200 qəbul plan yerinə qarşı 66-sı dövlət sifarişli, 130-u ödənişli olmaqla, 196 nəfər təhsil almaq hüququ qazanmışdır ki, bu da nəzərdə tutulan planın 98 faizinin yerinə yetirilməsi deməkdir.
Bildirilib ki, cari tədris ilində kollecdə, ümumilikdə, 624 tələbə təhsil almaqdadır. Ötən tədris ilində 8 ixtisas üzrə 9 qrupda 111 tələbə məzun olmuşdur. Onlardan 16-sı kolleci fərqlənmə diplomu ilə bitirmişdir.
Qeyd olunub ki, kollecin təhsil keyfiyyətinin bir göstəricisi də subbakalavrların müsabiqədənkənar yolla ali təhsil müəssisələrinə qəbul olub təhsil almalarıdır. Kollecin məzunları da bu imkanlardan yararlanıb. Son 4 ildə məzunlarından 297-si ali təhsil müəssisələrinə qəbul olmuşdur.
Təhsil naziri kollecin məzunlarını ali təhsil müəssisələrinə qəbul olmaları, müəllim və tələbə kollektivini isə yeni tədris ilinin başlanması münasibətilə təbrik edib, onlara uğurlar arzulayıb.
Naxçıvan Dövlət Texniki Kollecinin direktoru Asəf Ruşanov 2021-2022-ci tədris ilində görülmüş işlər və qarşıda duran vəzifələrlə bağlı məlumat verib, qazanılan uğurlardan bəhs edib.
Kollecin Bank işi ixtisası üzrə məzunu, Naxçıvan Dövlət Universitetinin İqtisadiyyat ixtisasının I kurs tələbəsi Vəfa Həsənova, Rabitə qovşaqları və kommunikasiya sistemləri ixtisası üzrə məzun, Azərbaycan Texniki Universitetinin Elektrik və elektronika mühəndisliyi ixtisasının I kurs tələbəsi Ramidə Qurbanlı çıxış edərək keyfiyyətli təhsil almaları, bacarıqlı kadr kimi yetişmələri üçün göstərilən dövlət qayğısına görə minnətdarlıqlarını bildiriblər.
Tədbirdə kolleci bitirən məzunlara diplomlar təqdim olunub.
Sonra Naxçıvan Dövlət Texniki Kolleci tələbələrinin 2021-2022-ci tədris ilində müxtəlif müsabiqə, bilik və idman yarışlarında əldə etdikləri nailiyyətlərdən ibarət sərgiyə baxış olub.
Naxçıvan Muxtar Respublikası Təhsil Nazirliyinin mətbuat xidməti
***
Naxçıvan Müəllimlər İnstitutunda birinci kurs tələbələrinin valideynləri ilə görüş keçirilib. Tədbiri institutun rektoru Azad Novruzov açaraq bildirib ki, əsasını ulu öndər Heydər Əliyevin qoyduğu təhsil siyasəti bu gün uğurla davam etdirilir. Təhsilin maddi-texniki bazasının gücləndirilməsi diqqətdə saxlanılır və ixtisaslı kadrların hazırlanmasına dövlət tərəfindən lazımi şərait yaradılır. Gənc nəslin sağlam ruhda yetişməsinin, dünya standartları ilə ayaqlaşan təhsillə təmin edilməsinin dövlət siyasətinin prioritet istiqamətlərindən biri olduğunu qeyd edən rektor, zəngin dünyagörüşün, yüksək mədəniyyətə malik güclü şəxsiyyət və vətənpərvər mütəxəssislərin yetişdirilməsinin institutun əsas vəzifələri olduğunu nəzərə çatdırıb, bu məqsədlərə nail olmaq üçün Naxçıvan Müəllimlər İnstitutunun bütün gücünü və potensialını səfərbər edəcəyini bildirib.
Görüşdə bir sıra mühüm məsələlərə toxunulub, institutda tələbələrin təhsil alması üçün yaradılan şərait və imkanlar, imtahan prosesi, valideyn-institut əlaqələrinin vacibliyi kimi məsələlər müzakirə olunub. Azad Novruzov valideynləri institutun həyatında hərtərəfli iştiraka dəvət edib, təhsil illərində tələbələrin bilik və bacarıqlarının, dünyagörüşlərinin artırılması, əsl vətənpərvər, savadlı, yüksək intellektual potensiala malik, dövlətimizə və cəmiyyətimizə yararlı şəxsiyyət və kadr olaraq yetişmələrinin vacibliyini vurğulayıb.
Tədbirin sonunda valideynlər bu kimi tədbirlərin tədrisin keyfiyyətinin daha da yaxşılaşdırılmasında institut-valideyn əlaqələrinin rolunun artırılmasına mühüm töhfə olduğunu, onların üzərinə düşən vəzifələri maksimum səviyyədə yerinə yetirəcəklərini, övladlarının yaxşı təhsil almaları üçün institutda yaradılan şəraitdən məmnunluqlarını bildiriblər.
Naxçıvan Müəllimlər İnstitutunun mətbuat və
ictimaiyyətlə əlaqələr xidməti
