Fevralın 10-da Naxçıvan Muxtar Respublikasının İnsan Hüquqları üzrə Müvəkkilinin (Ombudsmanın) və Naxçıvan Muxtar Respublikası Ədliyyə Nazirliyinin birgə təşkilatçılığı ilə “Uşaqlarla ünsiyyət hüququ” mövzusunda tədbir keçirilib.
Tədbirdə Naxçıvan Muxtar Respublikasının İnsan Hüquqları üzrə Müvəkkilinin (Ombudsmanın) əməkdaşları Asiman Abbasov, Təhminə Ələkbərova, Elməddin Tahirov, Naxçıvan Muxtar Respublikası Ədliyyə Nazirliyinin, Ailə, Qadın və Uşaq Problemləri üzrə Dövlət Komitəsinin, Naxçıvan Şəhər İcra Hakimiyyətinin qəyyumluq və himayə orqanının əməkdaşları və valideynlər iştirak edib.
Tədbiri giriş sözü ilə açan Ədliyyə Nazirliyinin şöbə rəisi Emin Kazımov və İnsan Hüquqları üzrə Müvəkkil (Ombudsman) Aparatının şöbə müdiri Asiman Abbasov bildiriblər ki, Azərbaycan Respublikasında uşaqların müdafiəsi və inkişafı, onların hüquqlarının qorunması istiqamətində həyata keçirilən dövlət uşaq siyasəti uşaqların hərtərəfli kamil şəxsiyyət və layiqli vətəndaş kimi formalaşmasına xidmət edir.
Sonra Naxçıvan Muxtar Respublikasının İnsan Hüquqları üzrə Müvəkkilinin (Ombudsmanın) əməkdaşı Təhminə Ələkbərovanın, Ədliyyə Nazirliyinin əməkdaşı Rəşad Allahverdiyevin, Ailə, Qadın və Uşaq Problemləri üzrə Dövlət Komitəsinin əməkdaşı Elton Həziyevin, Naxçıvan Şəhər İcra Hakimiyyətinin qəyyumluq və himayə orqanının əməkdaşı Səfər Vəliyevin mövzu ətrafında çıxışları dinlənilib.
Qeyd olunub ki, bu sahəyə dövlət nəzarətinin məqsədi uşaqların Azərbaycan Respublikasının Konstitusiyası və qanunları ilə müəyyən edilmiş hüquqlarının və mənafelərinin qorunması, uşaq hüquqlarının təmin edilməsi üçün əlverişli mühit yaradılması, uşaq hüquqlarının pozulmasına səbəb olan halların aradan qaldırılması və qarşısının alınmasıdır.
Diqqətə çatdırılıb ki, uşaq hüquqları ilə bağlı beynəlxalq və milli qanunvericiliyə uyğun olaraq, uşaqlardan ayrı yaşayan valideyn onlarla ünsiyyətdə olmaq, uşaqların tərbiyə və təhsili ilə bağlı məsələlərin həll edilməsində iştirak etmək hüququna malikdir. Valideyn-uşaq münasibətlərinin, eləcə də uşaqla ünsiyyətin qurulmasının uşağın həyatının bütün sahələrinə - psixi sağlamlığından tutmuş dərslərindəki uğurlara və gələcəkdə münasibətlərin qurulmasına təsir göstərməsi hallarını nəzərə alaraq hər bir valideyn üzərinə qanunla qoyulmuş vəzifələrin məsuliyyətini anlamalı və uşaqların qanuni mənafelərini üstün tutmalıdır.
Tədbirin sonunda mövzu ətrafında fikir mübadiləsi aparılıb və valideynləri maraqlandıran suallar cavablandırılıb.
Naxçıvan Muxtar Respublikasının
İnsan Hüquqları üzrə Müvəkkilinin
(Ombudsmanın) mətbuat xidməti
