Uşaq ailənin, xalqın, dövlətin ən qiymətli sərvətidir. Bu qiymətli sərvəti cəmiyyətə faydalı vətəndaş, Vətənə sadiq övlad kimi böyütmək çətin və məsuliyyətli olduğu qədər də şərəfli bir işdir. Bu gün isə onların günüdür. Gələcəyimiz olan balalarımız üçün Naxçıvan şəhərində yerləşən Əcəmi seyrəngahında “Uşaqların rəngli dünyası” adlı bayram tədbiri münasibətilə hər tərəf al-əlvan rəngə boyanıb. Bu bayramda uşaqların sevimlisi olan kloun şou, müxtəlif hədiyyələr və konsert proqramı, rəqs nümunələri təşkil olunub. Biz də bir neçə şəhər sakini ilə görüşüb həmsöhbət olduq.
Şəhər sakini Vəli Əliyev deyir ki, bizim balaca fidanlarımız üçün düşünülüb təşkil olunan bugünkü tədbir biz böyüklərdə də xoş ovqat yaratdı. Mən də nəvəm Sevinclə birgə buraya gəlib vaxtımızı əyləncəli keçirməyə çalışırıq. Bu bayram günündə ən çox sevinənsə bizim balacalardır. Burada olan cizgi film qəhrəmanlarının personajlarını görən zaman nəvəmin sevinci birə-beş artdı. Müsahibimizə nəvəsi ilə birgə yaxşı istirahətlər arzulayıb növbəti sakinlərlə həmsöhbət olduq.
Naxçıvan şəhər sakini Limara Əlisoy balaca övladı Ayla ilə birlikdə gözəl vaxt keçirmək üçün gəlib. Limara xanım deyir ki, bu gün onların günüdür. Biz də valideyn olaraq çalışırıq ki, övladlarımız xoşbəxt, firavan böyüsün. Uşaqlar üçün təşkil edilmiş builki bayram hazırlıqları daha böyük çərçivədə aparılıb. Bir-birindən fərqli əyləncələr, konsert proqramı uşaqlarımızın əylənməsi üçün çox gözəl düşünülüb atılan bir addımdır. Mən də qızımın üzünü boyatdırdım. Eyni zamanda qızım gimnastika nümunələri göstərəcəyi üçün çox sevinclidir. Bu tədbirdə biz böyüklər də imkan tapıb asudə vaxtlarımızı övladlarımızla birgə səmərəli keçirdik. Müsahibimiz qeyd edir ki, Əcəmi seyrəngahının al-əlvan rəngə boyanması bu bayram tədbirinə xüsusi gözəllik qatır.
Digər müsahibimiz qazi övladı balaca İbrahim deyir ki, tədbir çox maraqlı və əyləncəlidir. Mən də anam və atamla birgə gəlmişəm və çox gözəl vaxt keçiririk. Hətta özümə burada balaca dostlar da tapdım. İndi gedirik onlarla birgə üzümüzü boyadaq. Eyni zamanda “Məktəbli” qəzeti də aldım ki, oxuyam. Bir sözlə hər şeyi çox bəyəndim. Məktəb dərslərimi yaxşı oxuyacam ki, anam məni tez-tez gətirsin - deyir balaca. Onun sevincini gözlərindən görmək mümkündür.
Müsahibələrimizdən də göründüyü kimi, muxtar respublika sakinləri bu bayram tədbirini böyük sevinc və yüksək əhvali-ruhiyyə ilə qarşılayır. Bu gün müstəqil Azərbaycanın uşaqları diqqət və qayğı ilə tam əhatə olunub. Ulu Öndər Heydər Əliyevin “Uşaqlar bizim sevincimiz, xoşbəxtliyimiz, cəmiyyətin gələcəyidir. Ona görə də hər bir insanpərvər cəmiyyətdə uşaqlara daimi xüsusi qayğı, xüsusi diqqət göstərilibdir” müdrik kəlamı uşaqlara olan məhəbbətin ən ali təzahürüdür.
Bülbül QULİYEVA
