Bakı Biznes Universitetinin koordinatorluğu ilə həyata keçirilən “Azərbaycan Rektorlar Konfransının yaradılması” adlı Erasmus+ layihəsi çərçivəsində Polşa Respublikasına bir həftəlik səfər baş tutub. İşgüzar səfərin ilk görüşü Varşava İqtisadiyyat Məktəbində olub. İclasda Azərbaycan Respublikası Təhsil Nazirinin müşaviri, layihə konsorsiumunun üzvü olan Azərbaycan Universitetlərinin rektorları və digər səlahiyyətli nümayəndələri, eləcə də Magna Charta Müşahidə Şurasının, Macarıstan Rektorlar Konfransının nümayəndələri iştirak edib.
Tədbirdə çıxış edən Varşava İqtisadiyyat Məktəbinin rektoru Piotr Wachowiak qonaqları salamlayıb və universitet haqqında geniş təqdimatla məlumat verib. Daha sonra rektor Polşa Rektorlar Konfransına üzv olmağın universitet üçün faydalarından və prezidenti olduğu Varşava Ali Təhsil Müəssisələrinin Rektorlar Konfransı barəsində danışıb. Polşa Rektorlar Konfransının prezidenti cənab Arkadiusz Mezyk isə Konfrans adından Azərbaycan nümayəndə heyətini salamlayıb və əməkdaşlıqdan məmnunluq duyduqlarını ifadə edib. O, Konfransın yaradılması ilə bağlı vacib məqamlara toxunub. Belə ki, Konfransın tarixi, hüquqi forması, statusu, daxili idarəetməsi, əsas fəaliyyət istiqamətləri, qərarvermə prosesi, daimi heyəti, o cümlədən Konfransın katibliyinin vəzifələri haqqında toplantı iştirakçılarına ətraflı məlumat verib. Arkadiusz Mezyk Konfransın yarandığı gündən indiyə qədər Polşa ali təhsil sisteminə verdiyi töhfələrdən, keyfiyyətin yüksəldilməsi istiqamətində irəli sürülən təkliflərdən və əldə etdikləri uğurlardan bəhs edib. A. Mezyk Konfransın iş dünyası, media nümayəndələri və digər Avropa ölkələrinin Rektorlar Konfransları ilə sıx əlaqələrinin olmasını da diqqətə çatdırıb.
Daha sonra Almaniya Rektorlar Konfransının Mərkəzi və Şərqi Avropa, Şərqi Asiya departamentinin rəhbəri Rudolf Smolarczyk Rektorlar Konfransının ali təhsil müəssisələri ilə beynəlxalq əməkdaşlığının genişləndirilməsi, eyni zamanda ölkədə universitetlərin koordinasiyalı fəaliyyət göstərməsi baxımından vacib olduğunu vurğulayıb. O, Almaniya Rektorlar Konfransının əsas məqsədləri, üzvlərinin tərkibi, strukturu, idarəedilməsi haqqında məlumatlar verib. Cənab Rudolf, həmçinin Polşa və Alman Rektorlar Konfransının təhsil siyasəti və müxtəlif inkişaf istiqamətlərinin müzakirəsi üzrə müntəzəm şəkildə əməkdaşlıq etdiklərini vurğulayıb. Yekunda toplantı iştirakçıları və Rektorlar Konfranslarının nümayənədləri arasında suallar əsasında faydalı müzakirələr aparılıb.
Həmçinin görüş çərçivəsində Polşa Təhsil Nazirliyində də görüş olub. Görüşdə Azərbaycan Respublikasının Polşa Respublikasındakı fövqəladə və səlahiyyətli səfiri Nərgiz Qurbanova, baş katibi Kənan Məmmədov, Polşa təhsil nazirinin müavini Tomasz Rzymkowski iştirak edib.
Görüş zamanı Azərbaycanla Polşa arasında təhsil sahəsində mövcud əməkdaşlıq məsələləri, iki ölkənin ali təhsil müəssisələri ilə ikitərəfli əlaqələrin genişləndirilməsi və birgə təhsil proqramlarının həyata keçirilməsi perspektivləri müzakirə olunub.
Qeyd edək ki, layihə çərçivəsində baş tutan səfərdə “Naxçıvan” Universitetini Beynəlxalq əlaqələr şöbəsinin müdiri Rəcəb Cəfərli təmsil edib.
