Naxçıvan Dövlət Universitetinin rektoru Elbrus İsayev ali təhsil müəssisəsinin tədris, elmi fəaliyyət, beynəlxalq əlaqələr ilə bağlı məlumat verib.
Qeyd edilib ki, Naxçıvan Dövlət Universiteti qardaş Türkiyənin bir sıra nüfuzlu universitetləri ilə səmərəli əməkdaşlığa malikdir. Naxçıvan Dövlət Universitetində təhsil alan 2 min nəfərə yaxın əcnəbi tələbənin də çoxu Türkiyədəndir. 1999-cu ildə Ümummilli Liderimiz Heydər Əliyevin birbaşa qayğısı və tövsiyəsi ilə Naxçıvan Dövlət Universitetində yaradılan Tibb fakültəsi ölkəmizin peşəkar tibbi kadrlarla təmin olunmasında mühüm rol oynayıb. Hazırda Naxçıvan səhiyyə sistemində çalışan həkim heyətinin böyük əksəriyyəti məhz bu fakültənin məzunlarıdır. Peşəkar tibbi kadrların hazırlanmasında Türkiyə Cümhuriyyətinin universitetlərinin çox böyük dəstəyi olub. Belə ki, hər il yüzlərlə tələbəmiz Türkiyənin Ankara, Qazi, İstanbul Yeditəpə, Koceli, Ərzurum Atatürk və sair universitetlərinin xəstəxanalarında rotasiya və stajkeçmədə iştirak ediblər. Məzunlarımızdan bir qismi Avropa və Türkiyənin müxtəlif xəstəxanalarında hazırda həkim kimi fəaliyyət göstərir.
Rektor qeyd edib ki, ötən tədris ilindən isə Türkiyənin qabaqcıl universitetlərinin professorları universitetimizə dəvət edilib və uzunmüddətli tədris prosesinə cəlb olunublar. Fakültəmizin müəllim heyətinin Türkiyə universitetlərində doktorantura təhsili almaları və elmi tədqiqata cəlb olunmaları təşkil edilib. Bütün bu dəstəyə görə rektor Elbrus İsayev türkiyəli rektor həmkarlarına minnətdarlıq edib.
Hacettepe Universitetin rektoru Mehmet Cahit Güran Naxçıvan Dövlət Universiteti ilə əməkdaşlığın hər iki universitetə fayda verəcəyini bildirib. O, rəhbərlik etdiyi ali təhsil müəssisəsinin Türkiyənin ən nüfuzlu universitetlərindən biri olduğunu, burada 3 min 700-dən çox akademik heyətin çalışdığını və 53 mindən çox tələbənin təhsil aldığını diqqətə çatdırıb. Bildirilib ki, universitetdə 16 fakültə, 15 institut, 4 peşə məktəbi, 2 məktəb, 1 konservatoriya fəaliyyət göstərir. Universitetdə 98 tədqiqat mərkəzi mövcuddur.
Qeyd edək ki, hər iki universitetin əsası 1967-ci ildə qoyulub.
Sonra qarşılıqlı müzakirələr zamanı türkiyəli rektor növbəti semestrdən etibarən akademik və tələbə mobilliyi proqramlarında, tədris materiallarının təmin olunmasında Hacettepe Universitetinin hər cür köməkliyə hazır olduğunu bildirib. Xüsusilə növbəti tədris ilindən etibarən Naxçıvanda fəaliyyətə başlayacaq Tibb bacısı işi ixtisası üzrə müəllim kadrların təmin olunması və Naxçıvan Dövlət Universiteti tələbələrinin Hacettepe kitabxanasından faydalanmaq imkanları barədə razılığa gəlinib.
Naxçıvan Dövlət Universitetində tədrisi ingilis dilində aparılan Tibb ixtisasında Hacettepe akademik heyətinin və xəstəxana təcrübəsindən istifadə barədə imkanlar müzakirə edilib.
Görüş zamanı Naxçıvan Dövlət Universitetinin Tibb Kollecinin də bu imkanlardan maksimum faydalana biləcəyi vurğulanıb, bir sıra tibb texniki ixtisaslarda təhsil alan tələbələrin Haccetepe Universitetində təcrübələrinin təşkilinə razılıq əldə edilib.
Görüşdə Azərbaycan Respublikasının Türkiyə Respublikasındakı Səfirliyinin təhsil müşaviri Nəcibə Nəsibova iştirak edib.
Görüşün sonunda qarşılıqlı hədiyyələr təqdim edilib, xatirə fotosu çəkilib.
