Şərur rayonunda Vətən müharibəsi şəhidlərinin xatirələrini əbədiləşdirmək məqsədilə inşa olunmuş bulaq-abidənin, xatirə lövhəsinin və Ev Muzeyinin açılış mərasimi keçirilib.
Əvvəlcə ümummilli lider Heydər Əliyevin və şəhidlərin xatirəsi bir dəqiqəlik sükutla yad olunub.
Çıxış edənlər şəhidlərin döyüş yolundan, onların göstərdiyi qəhrəmanlıq, igidlik və şücaətlərindən söhbət açıblar. Bildirilib ki, Maxta kəndinin vətənpərvər övladları şəhid Əli Camalov, Kərim Əhmədov, Sahib İbrahimov, Həsən Hümbətov, Novruz Həsənli və Əli Məmmədov torpaqlarımızın azadlığı uğrunda göstərdiyi şücaətlərlə seçiliblər.
Sonra bulaq-abidənin açılışı olub, məktəblilər Vətənə və şəhidlərimizə həsr olunmuş şeirlər söyləyiblər.
Danyeri kəndində isə şəhid Elşən Məmmədovun əziz xatirəsini əbədiləşdirmək məqsədilə ucaldılan xatirə lövhəsinin və Ev Muzeyinin açılışı olub.
Sonda tədbir iştirakçıları üçün ehsan süfrəsi açılıb.
