Naxçıvan Muxtar Respublikası Rəqəmsal İnkişaf və Nəqliyyat Nazirliyinin mühəndis-proqramçıları tərəfindən Naxçıvan Muxtar Respublikası Səhiyyə Nazirliyinin rəsmi internet saytı müasir iş prinsiplərinin və innovativ yeniliklərin tətbiqi məqsədilə yenilənib.
Veb-sayt (www.nsehiyye.gov.az) həm funksionallıq, həm də dizayn baxımından müasir tələblərə uyğunlaşdırılıb, yeni bölmələr əlavə edilib.
İstifadəçi rahatlığını nəzərə alaraq müxtəlif cihazların ekran ölçülərinə uyğun və innovativ yeniliklər əsasında hazırlanan sayt dizayn, quruluş və məzmun baxımından da istifadəçilər üçün əlçatan olması ilə fərqlənir.
Yenilənmiş informasiya resursu müvafiq qaydada təhlükəsizlik tədbirləri aparıldıqdan sonra AzStateNet şəbəkəsində yerləşdirilib. Saytın domen ünvanı da müvafiq qaydada yenilənməklə “gov.az” domeninə bağlı e-poçt adresi ilə təmin olunub.
Xatırladaq ki, Naxçıvan Muxtar Respublikası Rəqəmsal İnkişaf və Nəqliyyat Nazirliyi tərəfindən muxtar respublikada fəaliyyət göstərən dövlət orqanlarında rəqəmsallaşdırma istiqamətində görülən zəruri tədbirlər davam etdirilir. Cari ilin ötən dövründə 29 qurumun veb-saytı yenilənməklə AzStateNet şəbəkəsinə köçürülüb.
Naxçıvan Muxtar Respublikası Rəqəmsal İnkişaf və Nəqliyyat Nazirliyinin
mətbuat xidməti
