Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi 2023-cü ilin aprel ayından etibarən rayon və kəndlərdə vətəndaş qəbulunu həyata keçirir.
Bu məqsədlə Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova Kəngərli rayon Şahtaxtı kənd İcra Nümayəndəliyinin inzibati binasında Şahtaxtı kənd sakinləri ilə görüşüb, onların müraciətlərini dinləyib.
Görüşdə kənd sakinlərinin müraciət və şikayətləri dinlənilib, protokollaşdırılıb. Müraciətlər əsasən işlə təmin olunma, mülk məsələsi maddi yardım, ünvanlı dövlət sosial yardım, məktəbli geyim forması və dərs ləvazimatının verilməsinə köməklik göstərilməsi və digər məsələlərlə bağlı olub.
Vətəndaşlara müraciətlərlə bağlı hüquqi izahat verilib, komitənin səlahiyyət dairəsinə aid 3 müraciət yerindəcə həll olunub və digər məsələlər isə səlahiyyət xaricində olduğu üçün aid orqanlar qarşısında vəsatət qaldırılması ilə əlaqədar qeydiyyatı aparılıb.
Görüşdə Kəngərli Rayon İcra Hakimiyyəti başçısının müavini Səriyyə Qurbanova iştirak edib.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin mətbuat xidməti
