Ümummilli Lider Heydər Əliyevin 100 illik yubileyi ilə əlaqədar olaraq Naxçıvan Muxtar Respublikasının İnsan Hüquqları üzrə Müvəkkilinin (Ombudsman), Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin və Səhiyyə Nazirliyinin birgə təşkilatçılığı ilə 1 iyun – Uşaqları Beynəlxalq Müdafiə Günü münasibətilə hemofiliyalı, talassemiyalı və leykoz xəstəliyindən əziyyətçəkən uşaqlar üçün qanvermə aksiyası keçirilib. Xeyirxahlıq aksiyası muxtar respublikada yaşayan və həmin xəstəliklərdən əziyyətçəkən uşaqlara dəstək məqsədi daşıyır.
Aksiyada donorların və tibb işçilərinin təhlükəsizliyini təmin etmək üçün bütün zəruri tədbirlər görülüb, könüllülər tibbi müayinədən keçirilib, infeksion xəstəliklərə qarşı yoxlama aparılıb. Aksiyada iştirak edən könüllülərdən 6 litr qan toplanılaraq Naxçıvan Muxtar Respublika Xəstəxanasının qan bankına təhvil verilib.
Qeyd edək ki, bu humanist aksiya artıq 11 ildir ki, təşkilatçılar tərəfindən mütəmadi olaraq 1 iyun – Uşaqları Beynəlxalq Müdafiə Günü ilə əlaqədar keçirilir.
Naxçıvan Muxtar Respublikası Ailə, Qadın və
Uşaq Problemləri üzrə Dövlət Komitəsinin mətbuat xidməti