Naxçıvan Muxtar Respublikası Səhiyyə Nazirliyinin və “Əziz Əliyev adına Naxçıvan Muxtar Respublikası Mərkəzi Uşaq Xəstəxanası” publik hüquqi şəxsin birgə təşkilatçılığı ilə pediatriyanın aktual məsələlərinə həsr olunmuş konfrans keçirilib.
Konfransı giriş sözü ilə Naxçıvan Muxtar Respublikası səhiyyə nazirinin müavini Samrat Gəncəyeva açaraq müasir pediatriyanın aktual problemlərindən, muxtar respublikada uşaq xəstəliklərinin müayinə, müalicə və profilaktikası istiqamətində görülən işlərdən danışıb.
Konfransda muxtar respublikada uşaqların icbari dispanserizasiyası, profilaktik peyvəndlərin yeni təqvimə uyğun aparılması ilə bağlı məlumat verilib. Məktəblərdə və məktəbəqədər tədris müəssisələrində uşaqların dərindən tibbi müayinələrinin aparılmasında nələrə diqqət etmək lazım olduğu konfrans iştirakçılarının diqqətinə çatdırılıb. Məruzələrdə “Əziz Əliyev adına Naxçıvan Muxtar Respublikası Mərkəzi Uşaq Xəstəxanası” publik hüquqi şəxsin baş həkiminin müalicə işləri üzrə müavini İlkay Əliyeva “Pediatriyada antibiotiklərin istifadəsinə dair müasir yanaşma”, xəstəxananın həkim-anestezioloqu Cabir Həsənov “Pediatrik anesteziya – fərqli xüsusiyyətləri”, həkim- nevropatoloq Gülarə Əsədova “Autoimmun ensefalitlər”, Reanimasiya və intensiv terapiya şöbəsinin həkim reanimatoloqu Dilguşə İsmayılova “Pediatriyada təxirəsalınmaz vəziyyətlər”, Cərrahiyyə şöbəsinin müdiri Şəhla İmanova “Qarın ağrılarının diferensasiyası” mövzularında məruzə ilə çıxış ediblər. Məruzə ətrafında müzakirələrdə həkimlər tərəfindən məruzəçilərə suallar ünvanlanıb. Yekunda Naxçıvan Muxtar Respublikasında uşaq əhalisinə göstərilən tibbi xidmətlərlə bağlı qarşıda duran vəzifələr və bu vəzifələrin həlli ilə əlaqədar konfrans iştirakçılarına lazımi tapşırıqlar verilib.
Naxçıvan Muxtar Respublikası
Səhiyyə Nazirliyinin mətbuat xidməti