Azərbaycan Respublikası Dövlət Gömrük Komitəsinin Tibbi Xidmət İdarəsinin nəzdində yaradılmış Mərkəzi Gömrük Hospitalında Elmi Tədqiqat və Tədris Mərkəzinin direktoru, Milli Məclisin deputatı, YAP İdarə Heyətinin üzvü Rəşad Mahmudov,Türkiyənin Ege Universiteti ürək-damar cərrahiyyəsi uzmanı, professor Suat Buket, ürək-damar cərrahiyyəsi kafedrasının professor Çağatay Engin Naxçıvan Dövlət Universitetində olublar.
İkitərəfli görüşdə universitetin rektoru Elbrus İsayev qonaqları salamlayıb, onları ali təhsil ocağında görməkdən məmnunluq duyduğunu dilə gətirib. Rektor qeyd edib ki, Ümummilli Lider, Ulu Öndər Heydər Əliyevin dəstəyi ilə 1999-cu ildə “Təbiətşünaslıq” fakültəsinin nəzdində universitetdə ali tibb təhsilinin təməli qoyulub. Fakültənin maddi-texniki bazasını daha da möhkəmləndirmək və təhsilin keyfiyyətini yüksəltmək məqsədilə 2015-ci ilin may ayında universitetdə üç mərtəbəli kliniki xəstəxana istifadəyə verilib. Bildirilib ki, universitet xəstəxanasında müxtəlif xəstəliklərin müayinə və müalicəsiüçün ixtisaslaşmaqla yanaşı tələbələrin burada təcrübi dərslərinin keçilməsi məqsədilə əlverişli imkanlar yaradılıb. Vurğulanıb ki, həmçinin tələbələr ixtisaslarının profillərinə uyğun olaraq muxtar respublikanın müvafiq xəstəxanalarından baza xəstəxanası kimi istifadə edir.
Rektor diqqətə çatdırıb ki, Tibb fakültəsinin məzunları istər ölkə daxilində istərsə də xaricdə uğurla fəliyyət göstərməkdədirlər. Məzunlardan bir çoxu hal-hazırda Almaniya, İspaniya, Hollandiya, ABŞ, Nigeriya, Türkiyə, İran, Kipr, Gürcüstan və digər xarici ölkələrdə çalışır və ya təhsillərini davam etdirirlər. Qeyd olunub ki, Tibb fakültəsinin Türkiyənin bir sıra universitetləri ilə uzun illərdir sıx əlaqələri mövcuddur. Bildirilib ki, hər il Tibb fakültəsinin yuxarı kurs tələbələri yay istehsalat təcrübələrinin böyük bir hissəsini Türkiyənin Trabzon, Erzincan, Erzurum, Kayseri, Qars və digər şəhərlərində yerləşən universitetlərin klinikalarında keçirlər.
Mərkəzi Gömrük Hospitalında Elmi Tədqiqat və Tədris Mərkəzinin direktoru Rəşad Mahmudov universitetdə olmaqdan məmnunluq hissini ifadə edib. Həkim 14 ildən artıqdır ki, əhaliyə yüksəkixtisaslı və peşəkar tibbi xidmət göstərən mərkəz haqqında məlumat verib. Qeyd olunub ki, bu gün xəstəxanamızda tətbiq olunan yüksək tibbi texnologiyalar insan həyatını xilas etməyə və sağlamlığını qorumağa tam şəkildə imkan verir. Həmçinin diqqətə çatdırılıb ki, hospital müasir tibbi avadanlıqlarla təmin olunub.
Türkiyənin Ege Universitetinin ürək-damar cərrahiyyəsi uzmanı, professor Suat Buket, ürək-damar cərrahiyyəsi kafedrasının professoru Çağatay Engin çıxış edərək bildiriblər ki, İzmirdəki Ege Universiteti Tibb Fakültəsi hərtərəfli tibb təhsili verən əhəmiyyətli bir qurumdur. Güclü akademik heyəti və müasir tibbi tədqiqat mərkəzləri ilə tələbələrə geniş ixtisas seçimləri təklif edir. Eyni zamanda Ege Universiteti Xəstəxanası tələbələrə praktiki təhsil imkanları təmin edən istinad sağlamlıq müəssisəsidir.
Qarşılıqlı görüşdə birgə əməkdaşlıq barədə fikirlər səsləndirilib.
Sonra Tibb fakültəsində həkimlər tələbələr üçün ustad dərsi keçiblər.
Naxçıvan Dövlət Universitetinin
Televiziya, mətbuat və ictimaiyyətlə əlaqələr bölməsi
