Sərhədçi İdman Olimpiya Mərkəzində MMA, pankration və qrepplinq üzrə Azərbaycan çempionatı və birinciliyi keçirilib. Budəfəki yarış kütləviliyi ilə fərqlənib. Belə ki, üç gün davam edən yarışlarda 90-a yaxın komandadan, ümumilikdə, 1000-dən çox idmançı medallar uğrunda mübarizə aparıb.
Muxtar respublikanı Naxçıvan Kikboksinq Federasiyasının sədri Xəyal Abdullayevin rəhbərliyi ilə “Turan” Döyüş Klubunun 30 idmançısı təmsil edib. Təmsilçilərimiz üçün uğurlu keçən yarışda 11-i qızıl, 4-ü gümüş və 14-ü bürünc olmaqla, ümumilikdə, 29 medal qazanılıb.
İdmançılarımızdan ən yaxşı nəticə Nurəddin Əliyevə məxsusdur. O, 14-15 yaşlılar arasında hər üç növdə çempion olub. Röya Abdullayeva eyni yaş kateqoriyasında qızların MMA və qrepplinq yarışlarında birinci olub. Fidan Paşayeva, Fərid Oruczadə, Yaqub Hacıyev, İsmayıl Hüseynzadə, Əli Nəsrullayev və Turqut Abdullayev də çempionluq sevinci yaşayıb, eləcə də digər idmançılarımızla birgə müxtəlif əyarlı medallar əldə ediblər.
Əlavə edək ki, qrepplinq-gi növü üzrə 21-dən yuxarı yaş kateqoriyasında mübarizə aparan naxçıvanlı idmançı Fərid Əliyev 130 kiloqram çəki dərəcəsində birinci olub.
Naxçıvan Muxtar Respublikası Gənclər və
İdman Nazirliyinin mətbuat xidməti
