Azərbaycanda azad edilmiş torpaqların reabilitasiyasına mane olan əsas məqam minalanmadır və bu amil həmin ərazilərdə iqtisadi dirçəlişin əsasını təşkil edən çox istiqamətli layihələrin həyata keçirilməsi prosesini ləngidir.
Bunu iqtisadiyyat nazirinin müavini Sahib Məmmədov "2023-cü il Qlobal Dayanıqlı İnkişaf Məqsədləri (DİM) Sammitinin Nəticələri və DİM-lərin həyata keçirilməsində Ali Audit Qurumlarının rolu" mövzusunda 3-cü DİM Dialoqunda deyib.
"Təsadüfi deyildir ki, Prezident İlham Əliyev tərəfindən minatəmizləmə fəaliyyətinin 18-ci Dayanıqlı İnkişaf Məqsədi kimi BMT-nin 2030 Gündəliyinə əlavə edilməsi təşəbbüsü irəli sürülüb. Bu istiqamətdə 18-ci DİM-in layihəsi hazırlanaraq, yerli və beynəlxalq ictimaiyyətə təqdim edilib", - deyə nazir müavini qeyd edib.
S.Məmmədov diqqətə çatdırıb ki, 18-ci DİM 5 hədəf və 15 göstəricidən ibarətdir: "Bu hədəflər ərazilərin minalardan və partlamamış hərbi sursatlardan təmizlənməsi, bu istiqamətdə xərclərin artırılması, torpaq sahələrinin kənd təsərrüfatı dövriyyəsinə və iqtisadi fəaliyyətə cəlb olunması, əhalinin həyat səviyyəsinin yüksəldilməsi, o cümlədən həssas əhali qruplarının sosial müdafiəsinin gücləndirilməsidir".
