Naxçıvan Muxtar Respublikasının İqtisadiyyat Nazirliyi yerli ixracatçıların stimullaşdırılması məqsədilə üç şirkətə ümumi dəyəri 119 min manatdan çox olan İxrac Təşviqi Sənədi verib.
Bunu nаzir Tapdıq Əliyev iş adamlarının iştirakı ilə keçirilən tədbirdə bildirib.
Bundan başqa, onun sözlərinə görə, 2016-2023-cü illərdə 18 sahibkarlıq subyektinin 24 layihəsinə verilmiş İnvestisiya Təşviqi Sənədi çərçivəsində idxal edilən 77 milyon manatdan çox dəyərdə avadanlıqlara gömrük və vergi güzəştləri tətbiq edilib.
"Naxçıvanda istehsal olunan məhsulların - vafli məmulatları, peçenyelər, mineral sular, üzüm, araq, siqaret, travertin, mərmər, mebel, gipsolit karton lövhə, dolğu tozu, sement və məsaməli beton blokların 9 ölkəyə (Türkiyə, Rusiya, Gürcüstan, İran, İraq, Ukrayna, BƏƏ, Əfqanıstan və Yəmən) ixrac olunması məqsədilə bu il yerli “İstehlak Mallarının Ekspertizası Mərkəzi” MMC 247 mənşə sertifikatı verib. Müasir mərhələdə Naxçıvanda aqrar-sənayenin inkişafı həm daxili ehtiyacların ödənilməsinə, həm də ixracın genişləndirilməsinə yönəldilib. Bu gün ölkəmiz “Made in Azerbaijan” milli brendini xarici bazarlarda fəal tanıtmaqla ixrac coğrafiyasını genişləndirməkdədir. Qeyri-neft məhsullarının ixracı ilə məşğul olan şəxslər üçün ixrac təşviqlərinin tətbiqi bu məhsulların daxili istehsalını və ixracını xeyli artırıb. Məhz bu məqsədlə “Orqanik Naxçıvan” Publik Hüquqi Şəxsi yaradılıb. Bu brend adı altında Naxçıvanın orqanik məhsulları ölkə daxilində və xaricində satılacaq. Bundan əlavə, idxalı əvəzetmə potensialından rasional istifadə, ərzaq təhlükəsizliyinin təmin edilməsi və ixrac potensialının artırılması üçün aqroparkların yaradılması işləri də davam etdirilir”, - deyə nazir əlavə edib.
