Ölkəmizdə kiçik və orta biznesin inkişafı həmişə dövlətin diqqət mərkəzində olub. Bu məqsədlə həyata keçirilən tədbirlər arasında maarifləndirmə və təbliğat sahəsində işlərin həyata keçirilməsi də əhəmiyyət kəsb edir. Bu məqsədlə, 2017-ci ildə ölkəmizdə yaradılmış Kiçik və Orta Biznesin İnkişafı Agentliyi- KOBİA nın dəstəyi ilə bu ilin aprelindən başlayaraq Naxçıvan Biznes Mərkəzində Naxçıvan KOB İnkişaf Mərkəzinin təşkilatçılığı ilə təlimlərə başlanılmışdır.
Ötən may ayından başlayaraq mühasibat uçotu, insan resursları, turizm işinin təşkili, sahibkarlığın inkişafı, effektiv marketinq sisteminin qurulması, layihələrin idarə olunması, vergi qanunvericiliyi, effektiv satış sisteminin qurulması, dövlət satınalmaları, çevik idarəetmə mövzularında təlimlər təşkil olunub. Mərkəzdən aldığımız məlumada deyilir ki,
keçirilən təlimlərdə sahə üzrə ekspertlərin təqdimatları maraqla qarşılanmışdır. Belə ki, indiyə qədər təlimlərdə 600 dən artıq şəxs iştirak etmiş və onlara müvafiq sertifikatlar təqdim olunmuşdur. Təlimlər qarşıdakı aylarda da davam etdiriləcək. Qeyd edək ki, Naxçıvan KOB İnkişaf Mərkəzi kiçik və orta biznesin inkişafı məqsədilə təlimlərlə yanaşı məsləhət xidməti, şəbəkələşmə və məlumatlandırma xidmətləri də təklif edir.
Əli CABBAROV
