"Gündəlik Naxçıvan" xəbər portalında 08 noyabr 2023-cü il tarixdə və digər sosial şəbəkə hesablarında Şahbuz rayonu Külüs kənd tam orta məktəbində müəllimlərin məktəbə aid internetdən istifadəsinə qadağa qoyulması ilə bağlı məlumat yayımlanıb. Məlumat Naxçıvan Muxtar Respublikası Təhsil Nazirliyi tərəfindən dərhal araşdırılıb və həmin sosial şəbəkə hesablarına təkzib göndərilib.
Naxçıvan Muxtar Respublikası Təhsil Nazirliyinin təkzibində bildirilib ki, Şahbuz Rayon Rabitə İdarəsi ilə bağlanmış müqaviləyə əsasən sözügedən məktəbə 2.5 meqabit internet verilir. İnternetdən məktəb tərəfindən 3 elektron lövhə və kompüter otağında olan kompüterlərdən tədris prosesinə uyğun olaraq istifadə olunur.
Həmin internetdən müəllimlər şəxsi məqsədləri üçün istifadə etdikdə isə internetin sürəti aşağı düşür bu da tədrisdə müəyyən çətinliklər yaradır. Həmçinin müəllimlərin şəxsi məqsədlər üçün internetlə təmin olunması ilə bağlı məktəbin heç bir öhdəliyi yoxdur.
Qeyd olunur ki, məktəbdə tədris elektron lövhəli otaqlarda qrafikə əsasən, kompüter otaqlarında isə dərs cədvəlinə uyğun olaraq aparılır. Həmin qrafikdə və dərs cədvəlində nəzərdə tutulmuş tədris saatlarından kənar vaxtlarda müəllimlər öz şəxsi inkişafları üçün məktəbin elektron lövhələrindən və kompüterlərindən istifadə edirlər. Bunun üçün də peqaqoji heyətə heç bir məhdudiyyət qoyulmur.
Külüs kəndində mobil internetdən istifadə ilə problemə gəldikdə isə bildirilir ki, sakinlər Naxtel, Azərcell və Nar operatorlarından istifadə etməklə 4G şəbəkəsi ilə internetə qoşula bilirlər.
Məktəbdə suyun olmaması ilə bağlı məlumatın da həqiqəti əks etdirmədiyi vurğulanaraq bildirilir ki, hazırda məktəbdə su ilə bağlı heç bir problem yoxdur və digər vasitələrdən istifadə olunmaqla müvəqqəti olaraq məktəbə su çəkilib. Məktəbin artezian quyusunun avadanlığında olan nasazlıqla bağlı məlumat aidiyyəti qurumlara göndərilib. Yaxın müddət ərzində artezian quyusunda təmir işləri aparılacaq.
