Naxçıvan Dövlət Universitetinin rektoru, dosent Elbrus İsayev Avstriyaya səfəri çərçivəsində Avstriya Kənd Təsərrüfatı, Meşəçilik, Regionların və su resurslarının idarəedilməsi Nazirliyində olub, nazirliyin tədris və araşdırma departamentinin direktoru Josefa Reiter-Stelzlə görüş keçirib.
Görüşdə rektora və rəhbərlik etdiyi heyətə Avstriyanın kənd təsərrüfatı sahəsi haqqında geniş məlumat verilib. Bildirilib ki, Avstriya orqanik kənd təsərrüfatı məhsullarının istehsalı sahəsində tədris və araşdırma mərkəzlərində təhsil və tədqiqatın effektivliyi nəticəsində Avropa Birliyi ölkələri arasında liderdir. Eyni zamanda xanım Josefa Reiter-Stelzl tədris və araşdırma mərkəzlərində təhsil və tədqiqat işlərinin təşkili, müxtəlif qurumlarla əməkdaşlıq çərçivəsində aparılan layihələr haqqında Elbrus İsayevə və nümayəndə heyətinə məlumat verib.
Görüşdə bir sıra konkret əməkdaşlıq məsələləri ilə bağlı müzakirələr aparılıb. Naxçıvan Muxtar Respublikası Kənd Təsərrüfatı Nazirliyinin əməkdaşları, eləcə də universitetdə bu sahədə dərs deyən müəllim və tələbə heyəti üçün professional kursların keçirilməsi, magistr və doktorantura səviyyəsi üzrə naxçıvanlı tələbələrin Avstriya Kənd təsərrüfatı tədris və araşdırma mərkəzlərində təhsil və tədqiqat işlərinin həyata keçirilməsi imkanları müzakirə edilib.
Naxçıvan Dövlət Universitetinin rektoru, dosent Elbrus İsayevin təklifləri Josefa Reiter-Stelzl tərəfindən müsbət qarşılanıb və Naxçıvanda smart kənd təsərrüfatı idarəçiliyi ilə bağlı Avstriya Kənd Təsərrüfatı Nazirliyinin dəstək verməyə hazır olduğu ifadə olunub. Xatırladaq ki, görüşdə Azərbaycanın Avstriyadakı səfiri Rövşən Sadiqbəyli də iştirak edib.
Naxçıvan Dövlət Universitetinin Televiziya, mətbuat və
ictimaiyyətlə əlaqələr bölməsi
