Naxçıvan Dövlət Filarmoniyası noyabrın 29-da Türkiyə Respublikasının Qars şəhərində Azərbaycan Respublikasının Baş Konsulluğunun təşkilatçılığı ilə Trabzon şəhərində konsert proqramı ilə çıxış edib.
Ümummilli Lider Heydər Əliyevin anadan olmasının 100 illiyinə həsr olunmuş konsert başlamadan əvvəl çıxış edən ölkəmizin Qars şəhərindəki Baş Konsulu Nuru Quliyev Ulu öndərin xalqımız və dövlətçiliyimiz qarşısındakı müstəsna xidmətlərindən, Vətən müharibəsində qazandığımız möhtəşəm zəfərdən, Türkiyə-Azərbaycan qardaşlığı və birliyindən danışıb.
Naxçıvan Dövlət Filarmoniyasının Kamera Orkestrinin müşayiət etdiyi musiqi cələngində Müslüm Maqomayevin “Azərbaycan”, Aytən Alpmanın “Məmləkətim”, Fikrət Əmirovun “Min bir gecə” baletindən fraqmentlər, Tofiq Quliyevin “Sənə də qalmaz”, Üzeyir Hacıbəylinin “Çırpınırdın, Qaradəniz”, Eldar Mansurovun “Sabaha ilhamla” və digər musiqi və rəqs nömrələri təqdim edilib. Azərbaycan Respublikasının əməkdar artistləri-Tural Nəcəfov, Gülyanaq Fərzəliyeva, solist İlkin Abdullayevin ifa etdiyi əsərlər rəğbətlə qarşılanıb.
Konsert proqramı Cavanşir Quliyevin “Azərbaycan-Türkiyə” əsəri ilə sona çatıb.
Naxçıvan Muxtar Respublikasının
Mədəniyyət Nazirliyinin mətbuat xidməti
_30-11-2023_10-09-36.jpg)
