Aprelin 18-də Milli Məclisin Aqrar siyasət komitəsində “Qida təhlükəsizliyi sistemi və onun vahid sağlamlıq konsepsiyasında rolu” mövzusunda ictimai dinləmə keçirilib.
Milli Məclisin Mətbuat və ictimaiyyətlə əlaqələr şöbəsindən bildiriblər ki, komitə sədri Tahir Rzayev bildirib ki, bu gün dünyada baş verən iqlim dəyişikliklərinin, digər problemlərin müəyyən çətinliklər yaratdığını, qida çatışmamazlığının, qida zəhərlənmələrinin insanların səhhətinə ciddi təsir göstərdiyini söyləyib. Vurğulayıb ki, ölkəmizdə qida təhlükəsizliyinin təmin edilməsi istiqamətdə ardıcıl olaraq həyata keçirilən tədbirlər dövlətimizin başçısının bu sahəyə göstərdiyini diqqət və qayğının bariz nümunəsidir. O, ölkə Prezidentinin insan amilinə, Azərbaycan vətəndaşının sağlamlığının qorunmasına böyük önəm verdiyini qeyd edib.
Sonra çıxış edən Qida Təhlükəsizliyi Agentliyinin sədri Qoşqar Təhməzli mövzunun aktuallığını qeyd edib, qida təhlükəsizliyinin ölkədə yaradılan tarladan və fermadan süfrəyə qədər qida zəncirinin bütün mərhələlərini əhatə edən nəzarət sistemi olduğunu söyləyib. O, 2018-ci ildə yaradılan Qida Təhlükəsizliyi Agentliyinin fəaliyyəti barədə məlumat verib.
“Azərbaycan Respublikasında qida təhlükəsizliyinin təmin edilməsinə dair 2019–2025-ci illər üçün Dövlət Proqramı”ndan danışan Q.Təhməzli sənədin vacib məsələlərdən birinin qida təhlükəsizliyi sahəsində qanunvericiliyin təkmilləşdirilməsi ilə əlaqədar olduğunu deyib. O, həmçinin ölkə ərazisinə idxal olunan yüksək riskli qida məhsulları üzərində dövlət nəzarətin həyata keçirilməsindən bəhs edib, Agentliyin auditorları tərəfindən aparılan yoxlamalar barədə məlumat verib.
Digər çıxış edənlər - parlamentin səhiyyə komitəsinin sədri Əhliman Əmiraslanov, İqtisadi siyasət, sənaye və sahibkarlıq komitəsinin sədri Tahir Mirkişili, Təbii ehtiyatlar, energetika və ekologiya komitəsinin sədri Sadiq Qurbanov, kənd təsərrüfatı nazirinin müavini Sarvan Cəfərov insan sağlamlığının təmin edilməsi üçün sağlam və düzgün qidalanmanın ən zəruri amillərdən olduğunu bildirib, qida təhlükəsizliyi məsələsinin milli təhlükəsizliyin tərkib hissəsi olduğunu vurğulayıblar. Diqqətə çatdırılıb ki, ərzaq təhlükəsizliyi anlayışı insanların qidaya olan ehtiyaclarını, o cümlədən onların qidanı həm fiziki, həm də iqtisadi baxımdan əldə edə bilmək imkanını özündə ehtiva edir. Eyni zamanda, ərzaq məhsullarının təhlükəsizliyinin və keyfiyyətinin təmin olunması ilə bağlı kənd təsərrüfatı məhsullarının istehsalı və emalı sahəsində görülən işlər barədə məlumat verilib.
Dövlət Gömrük Komitəsi sədrinin müavini Cavad Qasımov qida təhlükəsizliyi ilə bağlı məhsulların idxalı və ixracı zamanı sərhəd-keçid məntəqələrində nəzarət tədbirlərinin həyata keçirildiyini qeyd edib.
Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev ölkənin iqtisadi potensialının artırılmasında ərzaq təhlükəsizliyinin təmin olunmasının, əhalinin sağlamlığının qorunmasının vacib amillərdən olduğunu söyləyib. Bu istiqamətdə qanunvericiliyin təkmilləşdirilməsinin əhəmiyyətini qeyd edib.
Daha sonra çıxış edən İqtisadiyyat Nazirliyinin Antiinhisar və istehlak bazarına nəzarət Dövlət Xidmətinin rəis müavini İlqar Həsənov, Azad İstehlakçılar Birliyinin sədri Eyyub Hüseynov, Səhiyyə Nazirliyinin İctimai səhiyyə və sanitar-epidemioloji nəzarət şöbəsinin müdiri Nəzifə Mürsəlova ölkəmizdə istehsal olunan qida məhsullarının ekoloji cəhətdən təmizliyi, keyfiyyətinin yaxşılaşdırılması, ərzaq təhlükəsizliyinin təminatı üçün istehlakçılar tərəfindən müvafiq qaydalara riayət edilməsinin vacibliyi vurğulayıb, qida ilə əlaqəli xəstəlik hallarının yayılmasının qarşısının alınması, istehlakçıların sağlamlığının qorunması istiqamətində görülən işlərdən danışıblar.
Sonra deputatların mövzu ilə bağlı fikir və qeydləri dinlənilib, Qoşqar Təhməzli qaldırılan məsələlərə münasibət bildirib.
