Naxçıvan Muxtar Respublikasının Maliyyə Nazirliyi yanında Maliyyə Tədris Mərkəzində Naxçıvan Muxtar Respublikasının 100 illik yubileyinə və 2 fevral-Gənclər Gününə həsr olunmuş “Mən mühasib olmaq istəyirəm!” adlı üçgünlük təlimlərə start verilib.
Təlimdə muxtar respublikanın müəssisə və təşkilatlarında çalışan gənc maliyyə-mühasibat işçiləri, ali və orta ixtisas təhsili müəssisələrinin tələbələri, bu sahəyə marağı olan digər şəxslər də daxil olmaqla, onlayn qeydiyyatdan keçmiş 70 nəfər iştirak edib.
Təlimin ilk günündə Maliyyə Tədris Mərkəzinin direktou Mehriban İmanova bir əsrlik tarixə malik olan Naxçıvan muxtariyyətinin yarım əsrinin Ümummilli Lider Heydər Əliyevin siyasəti ilə formalaşdığını və dövlət gənclər siyasətinin əsasının Ulu Öndər tərəfindən qoyulduğunu iştirakçıların diqqətinə çatdırıb.
Mərkəzin direktoru vurğulayıb ki, təlimin təşkil edilməsində məqsəd gənclərin mühasib peşəsinə olan marağını artırmaq və gənc mühasiblərin bu sahədə bilik və bacarıqlarının təkmilləşdirilməsinə şərait yaratmaqdan ibarətdir. Təlimdə iştirak edənlər mühasibatlıq sahəsində həm nəzəri, həm praktiki biliklərə yiyələnəcək, həm də rəsmi mühasibatlıq sahəsində vacib məqamlar öyrədiləcək.
Təlim zamanı mərkəzin baş mütəxəssisi Aytən Mənsumzadə mühasibat uçotunun mahiyyəti və mühasibin müəssisədəki rolunun vacibliyindən danışıb, maliyyə bərabərliyi, onun tərkib elementləri, əməliyyatların aparılması və bu əməliyyatların maliyyə bərabərliyinə təsirini əyani misallar üzərində izah edib.
Proqrama uyğun olaraq təlimin sonrakı iki gün ərzində davam edəcəyi nəzərdə tutulub.
