Fevralın 19-da Dövlət İmtahan Mərkəzi ali təhsil müəssisələrinin magistraturalarına qəbul imtahanı keçirib. İmtahan respublikanın 7 şəhər və rayonunda təşkil edilib. 18 min 724 bakalavrın iştirak etdiyi imtahanın idarə olunmasına 72 ümumi rəhbər, 202 imtahan rəhbəri, 1684 nəzarətçi-müəllim, 169 buraxılış rejimi əməkdaşı cəlb olunub.
Naxçıvan Muxtar Respublikasında Naxçıvan şəhər 5 və 14 nömrəli tam orta məktəblərdə təşkil edilən imtahanda 501 bakalavr iştirak edib. 40 zalda keçirilən və 3 saat davam edən imtahanların idarə olunmasına 6 rəhbər, 48 nəzarətçi ayrılıb. İmtahanda 50-si məntiqi təfəkkür, 25-i xarici dil, 25-i informatika olmaqla 100 sual təqdim olunub. Bakalavrların rahat şəkildə imtahan verməsi üçün zəruri şərait yaradılıb.
İmtahan nəticələri yaxın günlərdə elan ediləcək.
Güntac ŞAHMƏMMƏDLİ