Azərbaycan Respublikasının Gənclər və İdman Nazirliyinin dəstəyi, Naxçıvan Dövlət Universiteti və Naxçıvan Şəhər Gənclər və İdman İdarəsinin tərəfdaşlığı, Cahan Holdingin sponsorluğu, “Vətəndaş Cəmiyyətində Debat” İctimai Birliyinin təşkilatçılığı ilə Ümummilli Lider Heydər Əliyevin 100 illiyinə həsr olunan “I Naxçıvan Gənclər Debat Forumu – 2023” layihəsinin final, bağlanış və mükafatlandırma mərasimi keçirilib.
Tədbirin açılış nitqində “Naxçıvan Dövlət Universiteti”nin rektoru Elbrus İsayev, Naxçıvan Muxtar Respublikası Gənclər və İdman nazirinin müavini, nazir səlahiyyətlərini müvəqqəti icra edən Məcid Seyidov və “Vətəndaş Cəmiyyətində Debat” İctimai Birliyinin sədr vəzifəsini müvəqqəti icra edən Əli Abdullazadə çıxış edib. Açılış nitqindən sonra, rəsmilər və qonaqlar üçün forumun gedişatı ilə bağlı video-çarx təqdim olunub.
Forum çərçivəsində 6 Ali təhsil müəssisəsi və qurumun 26 komandası və 100-ə yaxın debatçı iştirak edib, 5 gün ərzində “Kütləvi İnformasiya Vasitələrində senzuranın tətbiqi vacibdir” mövzusu ətrafında 40 saata yaxın debat aparıblar.
Tədbirin bağlanış hissəsində forum çərçivəsində qalib, finalçı, ən yaxşı natiqlər və ən yaxşı hakimlər medal, kubok və sertifikatlarla mükafatlandırılıblar.
Qeyd edək ki, forum 15-20 noyabr tarixlərində Naxçıvan Dövlət Universitetində həyata keçirilib. Debat Forumunun məqsədi gənclər arasında Heydər Əliyev irsinin təbliğ olunması, debat və natiqlik mədəniyyətinin inkişaf etdirilməsi vasitəsilə onların qərarvermə proseslərində, ictimai aktuallıq kəsb edən məsələlərdə, dövlət gənclər siyasətinin həyata keçirilməsində iştirakını təmin etməkdir.
