Martın 10-da baş tutan "Güvən mənə" adlı konsert proqramının ifaçılarıdan Mətin Hüseynzadə təəssüratlarını "Şərq qapısı" qəzeti ilə bölüşüb: – İlk dəfədir ki, Naxçıvanda konsert proqramı ilə sevənlərimizlə bir araya gəldik. Naxçıvan mənim üçün daha doğmadır, çünki mənim anam da buralıdır. Konsertin təşkilatçılığına gəldikdə isə çox yüksək səviyyədə həyata keçirildi. Ən əsası da belə möhtəşəm bir konsertdə gənclərimiz sevilən ifalarımızla əylənərək bizi böyük sevinclə qarşıladı. Doğma Naxçıvan sakinlərinin yüksək əhvali-ruhiyyəsi bu gün konsertimizi daha da yaddaqalan etdi.
Bir digər müsahibimiz ifaçılardan Elvin Həsənov bildirdi:–Nəhayət, neçə müddətdir, səbirsizliklə gözlədiyimiz konsertimizi uğurla yekunlaşdırdıq. Səsləndirdiyimiz mahnıların hər biri üçün eşitdiyimiz gözəl sözlər bizi çox sevindirdi. Səhnədə olarkən Naxçıvan sakinlərinin enerjisi bizi daha da həvəsləndirdi. Naxçıvanda baş tutan bu konsertimiz bizim üçün daha gözəl və başqa oldu. Çox xoş təəssüratlarla ayrılacağıq buradan. Ümid edirik ki, Naxçıvanda sevənlərimizlə yenidən görüşəcəyik.
Bülbül Quliyeva