Naxçıvan Şəhər Uşaq-Gənclər İdman Məktəbində “Zərərli vərdişlərə yox deyək, həmişə sağlam olaq!” devizi altında kiçikyaşlı yeniyetmələr (2011-2013-cü illər) arasında sərbəst güləş üzrə Naxçıvan şəhər açıq birinciliyi keçirilmişdir.
Naxçıvan Muxtar Respublikası Güləş Federasiyasının və Naxçıvan Şəhər Gənclər və İdman İdarəsinin birgə təşkil etdiyi açıq birincilikdə Naxçıvan şəhərinin idmançıları ilə yanaşı, Kəngərli və Babək rayonlarının idmançıları da öz güclərini sınamışlar. Birincilikdə 11 çəki dərəcəsi üzrə 60-dan çox idmançı iştirak etmişdir. Dünya Güləş Birliyinin mövcud qaydalarına əsasən keçirilən yarışın yekununa gəlincə isə Asim Kərimli (20 kiloqram, Naxçıvan), Abbas Abbasov (23 kiloqram, Naxçıvan), Hüseyn Muradlı (26 kiloqram, Naxçıvan), Tunar Abdullayev (29 kiloqram, Naxçıvan), Məcnun Abbasov (32 kiloqram, Naxçıvan), Natiq Məmmədov (35 kiloqram, Naxçıvan), Əlirza Əliyev (38 kiloqram, Naxçıvan), Əbülfəz Cəfərov (42 kiloqram, Naxçıvan), Ramal Bağırov (47 kiloqram, Naxçıvan), Nicat İsmayılov (52 kiloqram, Naxçıvan) və Tuncay Əsgərli (59 kiloqram, Kəngərli) çəki dərəcələrində bütün rəqiblərini üstələyərək birinciliyin qalibi olmuşlar. Sonda hər çəki dərəcəsində I, II və III yerləri tutan idmançılar idarənin diplomları, federasiyanın isə medalları ilə mükafatlandırılmışlar.
Ceyhun MƏMMƏDOV
