Muxtar respublikada fəaliyyət göstərən nazirliklər arasında “Heydər Əliyev kuboku” uğrunda futzal turnirində bu həftənin cümə və şənbə günləri keçirilən görüşlərlə qrup mərhələsinə yekun vurulub.
Naxçıvan Muxtar Respublikası Fövqəladə Hallar Nazirliyi-İqtisadiyyat Nazirliyi oyununda birinci tərəf 8:1 hesablı qələbə qazanıb. Bu nəticə ilə Fövqəladə Hallar Nazirliyi təmsilçiləri yarımfinala adlayıblar. Növbəti görüşdə Maliyyə Nazirliyinin komandası üzərində 5:0-lıq qalibiyyət əldə edən Fövqəladə Hallar Nazirliyi “B” qrupunu lider kimi tamamlayıb. Səhiyyə Nazirliyinin komandasına növbəti oyunlarda iştirak etmədiyinə görə 0:5 hesablı texniki məğlubiyyət verilib. Buna əsasən Mədəniyyət və İqtisadiyyat nazirliklərinin göstəricilərinə 3 xal da əlavə olunub.
Qrup mərhələsindəki nəticələrdən sonra 4 komanda növbəti mərhələyə çıxıb. Turnirin reqlamentinə əsasən yarımfinal mərhələsində Gənclər və İdman Nazirliyi-Fövqəladə Hallar Nazirliyi, Maliyyə Nazirliyi-Rabitə və Yeni Texnologiyalar Nazirliyi matçları keçiriləcək.
Qeyd edək ki, Naxçıvan Muxtar Respublikasının Gənclər və İdman Nazirliyi ilə Naxçıvan Futbol Federasiyası tərəfindən birgə təşkil olunan yarışa 9 komanda qatılıb. Kollektivlər iki qrupda mübarizə aparıb. Hər qrupdan ən yaxşı göstəriciyə malik iki komanda “play-off”a adlayıb.