Heç bir zaman özünün müstəqil dövlət quruluşu və normal inkişaf vektoru olmamış ermənilərin əsl faciəsi SSRİ-nin dağılma ərəfəsində 1990-cı ildə qəbul etdikləri müstəqillik bəyannaməsində qonşularına qarşı irəli sürdükləri əsassız ərazi iddiaları ilə başlamışdır. Ermənilər üçün bugünkü acınacaqlı vəziyyətin yaranmasına gətirib çıxarmış və qardaş Türkiyənin az qala Ermənistan boyda olan Ağrı dağına və ətraf vilayətlərinə qarşı, həmçinin Ermənistan SSR və Dağlıq Qarabağın birləşməsini nəzərdə tutan həmin həyasız torpaq iddiaları məğlub ölkədəki qanunvericilik səviyyəsində bu gün də davam etdikcə bütün bölgədə davamlı sülhün bərqərar olması sual altına alınır. Məhz buna görə də Prezident cənab İlham Əliyevin fevralın 14-də keçirilən andiçmə mərasimindəki nitqində dediyi “Əgər bizə qarşı ərazi iddialarına son qoyulmazsa, əgər Ermənistan öz qanunvericiliyini normal qaydaya salmazsa, təbii ki, sülh müqaviləsi olmayacaq”,- fikirləri bu ölkənin sülhdən nə qədər uzaq olmasını bir daha göstərir. Qeyd edək ki, dövlət başçımız dünənki çıxışı zamanı məhz bu səbəbdən qarşıdakı dövr üçün müzəffər Ordumuzun daha da gücləndirilməsinin əsas vəzifə olduğunu bir daha vurğulamışdı.
Əli Cabbarov