Nazir Emin Əmrullayev Elm və Təhsil Nazirliyi, eləcə də nazirliyin müxtəlif strukturlarında əmək fəaliyyətinə başlayan “Maarifçi” proqramının məzunları ilə görüşüb.
Nazirlikdən bildirilib ki, Emin Əmrullayev təcrübə müddətində öyrəndikləri bilik və bacarıqların işə qəbul olunan proqram məzunlarının karyera hədəflərində mühüm rol oynayacağını bildirib.
Daha sonra elm və təhsil naziri peşəkar iş həyatının reallıqları, müasir əmək bazarının rəqabətqabiliyyətliliyi barədə danışıb, gənclərə gələcək fəaliyyətlərinin səmərəli təşkili ilə bağlı tövsiyələrini verib.
Sonda isə əmək fəaliyyətinə başlayan 9 nəfər “Maarifçi” ilə bağlı təqdimat nümayiş olunub.
Qeyd edək ki, Elm və Təhsil Nazirliyi, eləcə də qurumlarında təcrübə imkanları yaradan və 3 ay davam edən “Maarifçi” proqramını 24 nəfər müvəffəqiyyətlə bitirib. Proqramın təşkilində məqsəd elm və təhsil sahəsində insan resurslarının formalaşdırılması, praktiki fəaliyyətlə tələbə və məzunların sahəvi bilik, bacarıqlarının artırılması, onların təhsil sahəsində müasir yanaşmaları öyrənmələri, həmçinin təhsil islahatlarının həyata keçirilməsi prosesinə dəstək göstərmək olub.
