Naxçıvan Muxtar Respublikası Kənd Təsərrüfatı Nazirliyi Elmi-Texniki Şurasının iclası keçirilib. İclası giriş sözü ilə şuranın sədri, kənd təsərrüfatı naziri Bəhruz Bayramov açaraq iclasa çıxarılan mövzular haqqında məlumat verib.
Nazirliyin əməkdaşı Elmira Əliyeva “Üzüm bitkisinin xəstəlik və zərərvericilərinə qarşı mübarizə tədbirləri” mövzusunda çıxış edərək vurğulayıb ki, həmin xəstəliklər, əsasən, hava şəraitindən asılı olaraq müxtəlif dərəcədə inkişaf edir. Bu xəstəliklərin qarşısını almaq üçün müxtəlif tədbirlərin həyata keçirilməsinin vacibliyindən danışan məruzəçi nazirlikdə hərtərəfli imkanlar yaradıldığını diqqətə çatdırıb.
Akademik Həsən Əliyev adına “Araz” Elm-İstehsalat Birliyinin elmi işçisi Simuzər Həsənova “Üzvi gübrələr, onların növləri və səmərəli istifadəsi” mövzusunda çıxış edib. O bildirib ki, kənd təsərrüfatı bitkilərindən yüksək məhsul əldə etmək və torpağın münbitliyini artırmaq üçün aqrotexniki sistemlər içərisində gübrələrdən istifadə tədbirləri ən vacib yerlərdən birini tutur. Gübrələrdən səmərəli istifadə bitkilərdə şəkərin, nişastanın, yağların, zülalların və vitaminlərin miqdarını artırır.
Sonda mövzular geniş şəkildə müzakirə edilib.
Naxçıvan Muxtar Respublikası
Kənd Təsərrüfatı Nazirliyinin mətbuat xidməti