Yanvarın 18-də Naxçıvan Muxtar Respublikası Təhsil Nazirliyi tərəfindən cari tədris ilinin I yarımilinin yekunları ilə bağlı görüş keçirilib.
Təhsil müəssisələrinin rəhbərlərinin iştirakı ilə keçirilən görüşdə son dövrlərdə Nazirlik tərəfindən təhsillə bağlı həyata keçirilən əsas islahatlar, ümumtəhsil məktəblərinin ixtisaslı müəllim və yardımçı heyətlə komplektləşdirməsi, məktəblərdə tədrisin səviyyəsinin yüksəldilməsi ilə bağlı həyata keçirilən tədbirləri iştirakçıların diqqətinə çatdırılıb, fənn müsabiqələri və olimpiadaların nəticələri müzakirə olunub.
Görüşdə buraxılış imtahanlarının son 3 illik nəticələrinin də məktəblər və rayon Təhsil Şöbələri üzrə müzakirəsi aparılıb, 2023-2024-cü tədris ili üçün buraxılış imtahanlarında hədəflər müəyyənləşdirilib.
Naxçıvan Muxtar Respublikasının təhsil naziri vəzifələrinin icraçısı, nazir müavini Elxan Nəcəfov təhsil müəssisələrinin rəhbərlərinə II yarımildə də məktəblərdə tədrisin düzgün təşkili, şagirdlərin olimpiadalarda iştirakı, buraxılış imtahanlarının nəzarətdə saxlanılması, məktəb qiymətləndimələrinin qaydalara uyğun aparılması, məktəb-valideyin münasibətlərinin düzgün qurulması, “Naxçıvan Muxtar Respublikası 100 illiyi” ilə bağlı nəzərdə tutulmuş tədbirlərin yüksək səviyyədə keçirilməsi və digər məsələlərlə bağlı tapşırıqlarını çatdırıb.
