Aprelin 27-də (11 illik) orta təhsil səviyyəsi üzrə Dövlət İmtahan Mərkəzi tərəfindən keçirilən buraxılış imtahanlarında ən yüksək nəticə (300 bal) göstərən və “Sabahın alimləri” XIII Respublika Müsabiqəsində həvəsləndirici yerə layiq görülən məktəblilərlə görüş keçirilib.
Görüşdə Naxçıvan Muxtar Respublikasının təhsil naziri vəzifələrinin icraçısı, nazir müavini Elxan Nəcəfov məktəbliləri təbrik edərək, son dövrlərdə təhsil sahəsində həyata keçirilən uğurlu layihələrdən və şagird nailiyyətlərindən danışıb.
Qeyd olunub ki, bu il tam (11 illik) orta təhsil səviyyəsi üzrə keçirilən buraxılış imtahanlarında məktəblilərimiz yüksək nəticələr əldə ediblər.
Bildirilib ki, builki buraxılış imtahanlarındakı orta bal göstəriciləri son 3 il üzrə ən yüksək nəticədir və bölgələr arasında da Naxçıvan məktəbliləri yüksək nəticələrinə görə ölkə üzrə ikinci pillədə yer tutur.
Diqqətə çatdırılıb ki, buraxılış imtahanlarında 4 şagirdimizin ən yüksək nəticə olan 300 bal toplaması da şagird nailiyyətlərinin yüksələn xətlə inkişafının bariz nümunəsidir.
Elxan Nəcəfov XIII Respublika Müsabiqəsinin əhəmiyyətini də vurğulayaraq şagirdlərə bu tipli müsabiqələrə daha yaxşı hazırlaşmağı tövsiyyə edib və blok imtahanlarında iştirak edəcək məzunlara uğurlar arzulayıb.
Tədbirdə məktəblilərə “Paşa Həyat” sığorta şirkətinin hədiyyələri təqdim olunub.
Bütün şagirdlərə uğurlar arzulayırıq!
Naxçıvan Muxtar Respublikası Təhsil Nazirliyinin mətbuat xidməti
