Babək Rayon Mərkəzi Xəstəxanasındə hesabatlılığın formalaşması və elektronlaşmanın tam təmin olunması ilə bağlı tədbir keçirilmişdir

Babək Rayon Mərkəzi Xəstəxanasındə İcbari Tibbi Sığorta üzrə Dövlət Agentliyi və Səhiyyə Nazirliyinin birgə təşkilatçılığı ilə hesabatlılığın formalaşması və elektronlaşmanın tam təmin olunması ilə bağlı geniş tədbir keçirilmişdir. Tədbirdə Naxçıvan Muxtar Respublikasının İcbari Tibbi Sığorta üzrə Dövlət Agentliyinin İdarə Heyəti sədrinin müavini Vüsal Məmmədov,  Naxçıvan Muxtar Respublikası Səhiyyə Nazirliyinin aparat rəhbəri Vüsal Məmmədov və Babək Rayon Mərkəzi Xəstəxanasınin baş həkimi Asiman Yusifov iştirak etmiş və tədbirin keçirilməsinin zəruriliyindən və məqsədlərindən bəhs etmişlər.

Tədbir iştirakçılarına məlumat verilmişdir ki, icbari tibbi sığortanın tətbiqində iştirak edən tibb müəssisələrində “Səhiyyə informasiya idarəetmə sistemi”nin təkmilləşdirilərək tam mərkəzləşdirilmiş qaydada həyata keçirilməsi, sistemdə olan boşluqlar, yaranmış bir sıra nöqsanlar, yeni modulların yaradılması və bir sıra dəyişikliklərin edilməsi nəzərdə tutulur. Xüsusilə qeyd olunmuşdur ki, icbari tibbi sığortanın başlıca funksiyası və əsas məqsədi tibb müəssisələrinin düzgün hesabatlılığı və şəffaf maliyyələşmə mexanizminin yaradılmasından ibarətdir.

İcbari Tibbi Sığorta üzrə Dövlət Agentliyinin “Səhiyyə və tibbi statistika şöbəsi”nin müdiri Aysel Mikayılova və həmin şöbənin əməkdaşları Babək Rayon Mərkəzi Xəstəxanası tərəfindən 2023-cü il ərzində göndərilən hesabatlarda Agentlik tərəfindən sığorta ödənişindən imtina və ya sığorta ödənişinin qismən verilməsinin səbəblərini, tələb olunan maliyyə vəsaitlərinin buna görə azaldılaraq tibb müəssisəsinə ödənildiyini tibb işçilərinin nəzərinə çatdırmışdır.

Qeyd olunmuşdur ki, artıq tibb işçilərinin əmək haqqları, onlara verilən bonuslar yeni qaydalara uyğun ödənilir və buna görədə yekun olaraq hesabatın tam olaraq formalaşması tibb işçilərinin sosial müdafiəsinin daha da yaxşılaşmasına, eyni zamanda öz işlərinə daha həvəslə yanaşmalarına, həmçinin tibbi xidmətlərin kefiyyətinin artmasına xüsusi təkan verəcəkdir.

Tədbir diskussiya ətrafında davam etdirilmiş, təkliflər dinlənilmiş və həkimlərin sualları cavablandırılmışdır.

Qeyd edək ki, növbəti günlərdə tibb işçilərinin tam məlumatlandırılması və hesabatlarda olan nöqsanların tamamilə aradan qaldırılması üçün Agentliyin əməkdaşları tərəfindən Babək Rayon Mərkəzi Xəstəxanasında fərdi qaydada təlimlərin keçirilməsi nəzərdə tutulmuşdur.

Hesabatlılığın formalaşması və elektronlaşmanın tam təmin olunması ilə bağlı tədbirlər Agentliklə müqaviləsi olan digər dövlət tibb müəssisələrində də davam etdiriləcəkdir.

 Naxçıvan Muxtar Respublikası İcbari Tibbi

Sığorta üzrə Dövlət Agentliyinin mətbuat xidməti