Aprelin 6-da Ordubad Rayon Mədəniyyət Sarayında yazıçı-dramaturq Əhməd Orucun “Oğru” musiqili komediyası əsasında hazırlanan eyniadlı tamaşa nümayiş olunub. Mədəniyyət və ictimaiyyət nümayəndələri, rayonun idarə və təşkilatlarının əməkdaşları tərəfindən izlənən tamaşanın rejissoru Naxçıvan Muxtar Respublikasının Əməkdar mədəniyyət işçisi Günəş Ağayeva, quruluşçu rejissoru Nadir Məhərrəmovdur.
Səhnə əsərində aktyorlardan Nadir Məhərrəmovun(Məmmədhüseyn), Süqarə Mirzəlinin(Nəzakət), Nağı Əlisoyun(Oğru), Pınar Bilalovanın(Musya), Davud Məmmədovun(Xankişi), Günəş Ağayevanın ( Tükəzban) canlandırdığı obrazlar alqışlarla qarşılanıb.
Qeyd edək ki, 1964-cü ildə yaradılan Ordubad Rayon Xalq Teatrı hər il maraqlı tamaşalarla teatrsevərlərin qarşısına çıxır. Ölkənin bir çox teatrları tərəfindən tamaşaya qoyulan “Oğru”əsəri teatrın repertuarına bu ildən salınıb.
Naxçıvan Muxtar Respublikasının
Mədəniyyət Nazirliyinin mətbuat xidməti