AZ EN RU

Naxçıvanın şirniyyat məhsulları beynəlxalq sərgidə nümayiş olunub

    Yerli məhsulların xarici bazarlarda tanıdılması, “Made in Azerbaijan” brendinin təşviqi məqsədilə Naxçıvan sahibkarları müxtəlif formatlı tədbirlərdə, o cümlədən mütəmadi olaraq beynəlxalq sərgilərdə iştirak edirlər. Növbəti dəfə yerli məhsullarımız 2022-ci il 8-10 noyabr tarixlərdə Dubay şəhərində keçirilən “İSM Middle East-2022” beynəlxalq şirniyyat sərgisində nümayiş edilib.
    Yaxın Şərq və Şimalı Afrikanın ən böyük şirniyyat sərgisində dünyanın 50-dən çox ölkəsinin 330-dan çox şirkətinin şokolad və şokolad məhsulları, şəkərli şirniyyatlar, vaflilər, təbii qəlyanaltılar, dondurmalar və dondurulmuş şirniyyatlar, müxtəlif çeşidlərdə meyvəli şirniyyat məhsulları nümayiş olunub. Tədbirə 110 ölkədən 10 mindən çox ziyarətçi qatılıb. 

     “Ləzzət Qida Sənaye” Məhdud Məsuliyyətli Cəmiyyətinin direktoru və nümayəndələrinin iştirak etdiyi sərgidə şirkət tərəfindən istehsal edilən müxtəlif çeşidlərdə vafli, peçenye, maşmelo, lokum, qarğıdalı çubuqları, limonadlar və digər məhsullar nümayiş olunub.     
    Sərgi çərçivəsində “Ləzzət Qida Sənaye” Məhdud Məsuliyyətli Cəmiyyəti öz məhsullarını nümayiş etdirməklə yanaşı, İraq, Səudiyyə Ərəbistanı, Yəmən, Özbəkistan, Birləşmiş Ərəb Əmirliklərində və digər ölkələrdən potensial alıcılar ilə məhsul satışı və yeni əməkdaşlıq imkanlarına dair müzakirələr aparıblar.

Naxçıvan Muxtar Respublikası İqtisadiyyat  
Nazirliyinin mətbuat xidməti

Nəşr edilib : 15.11.2022 19:19